疫情消息︱袁國勇:全民檢測一啲用都冇 警未助追蹤 邊境仍漏毒

複製連結 分享
有傳港府一眾高官與專家日前北上深圳,與大陸衞健委會見,商討全民檢測和禁足令等問題;保皇黨近期亦積極製造輿論,力推全民檢測。不過政府專家顧問、港大微生物學系講座教授袁國勇對此有保留,直言若邊境仍「漏毒」未做好「封關」,又不動用至少逾萬名紀律部隊追蹤個案,「全民檢測係一啲用都冇」。

「就算全民檢測,如果邊境漏入嚟,一樣再爆」

有建制派要求政府推全民檢測,袁國勇稱不反對全民檢測,但有保留,「就算你全民檢測咗,如果邊境都係有漏入嚟,或者冷藏貨物、食物入嚟帶有病毒,如果社交距離措施又全部放鬆晒,又咪一樣再爆,你係咪可以接受每隔一、兩個月做一次呢?」
武肺疫情在香港肆虐接近一年,袁國勇直言,政府在追蹤個案速度「唔夠快、唔夠有效率」,建議可考慮追蹤多一層的密切接觸者,「同內地專家傾過……佢地唔止追蹤密切接觸者,佢再追蹤埋同密切接觸者嘅密切接觸者,於是行前疫症一至兩步。」
他又建議,政府在追蹤個案時動用紀律部隊,「香港起碼用一萬個紀律部隊(人),當有病例出現,你能夠即時做到呢個(追蹤)……如果你唔動用咁多人力物力做呢樣嘢,全民檢測係一啲用都冇」,而每次追蹤和檢測應在24小時內完成。他又透露,政務司司長張建宗將在處理進口冷凍貨物上「做啲工作」,防止病毒經貨物輸入香港。
疫情反覆,主持人問及袁國勇,日前到深圳與大陸衞健委見面時有否被「詐型」。袁僅稱:「係內部秘密會議……我就唔方便再講多啲嘢。」
-----------------------------