焦慮症 | 預視生活轉變憂病情復發 醫生:早作準備壓力可避

複製連結 分享
精神科專科 李德誠醫生
G是一位老師,早年因為工作壓力,患上焦慮症,服藥和接受心理治療後,已經痊癒。過去幾個月,因為疫情,G需要在家中視像授課,雖然工作模式改變不少,但也能夠應付,沒有復發的迹象,不過,最近覆診時,G提到新的憂慮。
 

「雖然最近呢幾個月都唔錯,不過,九月開學之後,如果都仲係要網上授課嘅話,到時可能會有啲問題,因為𠵱家教緊嘅係上年九月時候已經識落嘅同學,但係今年九月開課,有部份會係新嘅同學,之前同佢哋並唔認識,要喺網上授課,同埋要做班主任工作嘅時候,將會幾頭痛……」。
 
其實過去幾個月,不少朋友都反映,在網上遙距工作,有時較在辦公室工作更辛苦。至於G的情況就更困難,因為無論科技如何發達,也不能代替人與人之間,面對面的接觸和交往,要在網上開展一個新的關係,建立新的信心,確有一定的難度。
 
「醫生,咁我有啲乜嘢可以做,防止開學之後,因為呢個困難而攪到又緊張番,甚至復發呀?」
 
G已經明白到,醫病除了服藥外,生活上的調節也非常重要,所以醫生也忍不住讚她:「妳咁樣諗就啱喇,如果預先有準備,到壓力嚟嘅時候,影響會較細……妳可以睇吓自己生活上,喺九月嘅時候會唔會有乜嘢其他事情可能同時會發生,最常見係裝修呀、搬屋呀,新嘅進修課程呀,又或者屋企嘅小朋友轉學校,甚至係轉換家務助理嘅姐姐,如果我哋可以及早審視一下,盡量唔好喺九月嘅時候,有其他嘅壓力轉變同時會出現嘅話,到時就可以集中精神,淨係處理學校工作,咁自然壓力亦都會較少,如果唔係嘅話,到時就好似玩雜技一樣,同一時間要喺空中不停咁樣拋四、五個波波,咁就有機會可能頂唔順,真係會出現復發㗎喇。」
 
其實G遇到的情況,不單在疫情或作為老師才會出現,平常我們的生活,也可能預見到有些較大的考驗將會發生,例如要署任升職,遇到這個情況,除了全力以赴外,也可以盡量避免同一時間,有其他的轉變同時出現,如果我們能夠預先做好防禦工作,便可以把壓力降到最低。
 
撰文:李德誠醫生
精神科專科
http://fb.me/1486drlee