【李八方online】「分析」專家報告質疑武肺源自美國 工聯會陳穎欣傳假消息

複製連結 分享
陳穎欣YouTube影片截圖
陳穎欣YouTube影片截圖
網絡嘅世界真係謠言滿天飛,最近藍絲group最廣傳嘅一單消息,就係武漢肺炎來自美國,八方就梗係聽到嚇一跳,然後得啖笑啦。點知自稱英國倫敦大學法學學士畢業、之前區議會選舉落敗嘅工聯會小花陳穎欣竟然信到十足,仲拍片「分析」埋專家報告,最後咪俾專家一把打落嚟,批評佢曲解囉。

盛傳區選落敗嘅陳穎欣,嚟緊有機會代表工聯會出戰勞工界功能組別議席,點知未出戰先嚇親人。話說佢之前就喺YouTube上載咗題為「英國德國科學家新發現拆穿英美向中國索償陰謀,源頭為美澳?首宗去年9月出現?英美都心虛?」嘅影片,內容引述劍橋大學嘅報告,質疑武漢肺炎病毒源頭唔係嚟自武漢,反而嚟自美國或者澳洲,而條片去到今日已經有38萬人睇過,唔知幾多無知婦孺真係俾條片fake咗?

《傳真社》就此問過陳穎欣所引述嘅劍橋專家團隊,團隊直接指出陳穎欣對報告有誤解,事實係「有數據強烈說明病毒爆發初期是在東亞人之間傳播,尤其中國人」,同陳穎欣所講嘅完全唔同。

究竟係陳穎欣英文差睇唔明,定想借份報告斷章取義呢?得佢自己先知喇。傳真社話已經透過Facebook、YouTube、WhatsApp通知陳穎欣影片內容有誤,不過陳穎欣都係冇回覆。
-----------------------------
登記選民按此
香港人,反攻!
登記做選民,5月2日截止
-----------------------------
App內1-Click訂閱《蘋果動新聞》
按此了解更多